-
يا ترى هو ليه المجلس العسكرى وقف ضد مبارك إللى مربيهم ومنغنغهم وحاططهم على حجره؟ طبعاً علشان إن مبارك كان يخطط لوهب المملكة المصرية لابنه الننوس ( المدنى ) مما يعنى انسحاب البساط من تحت إيد العسكريين إللى محتلين أغلب الهيئات والأحياء والمدن وغيره .. إشطة يا مان هات إللى بعده.
راح مبارك وراح الننوس والساحة فضيت .. أيوة فضيت بس فيه انتخابات حتجيب حكومة تسن قوانين وتشريعات ودستور يقلص من دور العسكريين فى الحياة العامة وتهب العرش لمدنى .. طيب نعمل إيه؟ خطة زكية للتخلص من القوة السياسية والشعبية العظمى فى البلاد وهى القوة الإسلامية فكانت أحداث التحرير .. إثارة واستفزاز والقنوات الليبرالية تتصل بناس كل واحد يقول: بيضربونا أرجوكم انزلوا الميزان وأنا بنفسى سمعت واحد مش أمور بيقول على القناة: إلحقونا إعىء إهىء بيضربونا بغاز بيشوى الوجوه ( حسسنى إن إحنا فى يوم القيامة ابن اللئيمة ) المهم .. لو الإسلامين نزلوا وحدثت مصادمات تشتغل القنوات إياها: الإسلاميين يريدون خراب البلاد .. إيه العنف ده .. أمال لو مسكوا البلد حيعملوا إيه؟؟؟؟؟ طيب لو الإسلاميين ما نزلوش تقول القنوات: أهو يا عم المشايخ حرموا النزول والتيارات الإسلامية باعت الثورة ونايميين فى الدفا وشباب الثورة بيموت عند محمد محمود ... آآآآه محمد محمود.. هو ده الشارع مفتاح اللغز .. ليه الناس رايحة هناك ؟ هو إنت مش معتصم فى التحرير .. لأ أصلى الداخلية حيتسللوا من خلاله للهجوم على الثوار فى التحرير .. يا سلاااااااااااااااااام يعنى مفيش غير الشارع ده تخش منه الداخلية.. طيب مين ا لأشخاص إللى بيضربوا نار ومولوتوف والله أعلم تانى من العمارات إللى فى الشارع .. طيب ليه الثوار مش قادرين يمسكوهم؟ ليه الجيش مش قادر يبعت 200 صاعقة يجيبوهم من ودانهم؟ طيب ليه الداخلية هى إللى بتحذر منهم مش الجيش مثلاً وبتقول عنهم قوى مضادة للثورة؟ يا ترى مين هى القوى دى؟؟؟؟؟؟؟؟؟؟؟؟؟؟؟؟؟؟؟ ده هو سؤال المليون بس أنا مش حعمل زى جورج قرداحى وأنشف دمكم .....
الجيش عامل كاردون حوالين الداخلية والبلطجية ( الثوار إعلامياً ) بيهجموا على مديريات الأمن فى كل المحافظات .. يبقى فيه قوى عايزة الداخلية تخترق زى أيام يناير وتتحرق الأقسام والظباط كل واحد يلاقيلو مصلحوا ويرفعوا شعار ( طير إنت ) فبالتالى مفيش شرطة .. يعنى يطلع العيسوى ويقول الشرطة غير قادرة على تأمين الانتخابات .. طيب مين إللى يحمى الانتخابات ؟؟ المجلس العسكرى طبعاً حاجة مش محتاجة فكاكة .. يبقى كده سلمنا الانتخابات للقوى المضادة للثورة .. استنى استنى .. بلاى باك لو سمحت تقصد إن الـ ... الـ هو القوى المضادة للثورة .. طبعاً اللواءات الحلوين طالبوا ظباط وزارة الداخلية بتسليم سلاحهم .. عارفين ده معناه إيه ؟؟ معناه إركن على جنب يا بوليس .. لكن ظباط الداخلية قالوا على جثثنا وإحنا مستعدين للانتخابات تحت أى ظرف ونأمنها.. هناك من يعمل على تسليم وزارة الداخلية للثوار ليخلصلوا على البقية الباقية وشكراً ..علشان كده حتلاقى الإخوان والسلفيين محاوطين مديريات الأمن لحمايتها علشان الانتخابات تتم يا عم إنت إللى إنت بتقوله إبقى إتغطى كويس إنت ونايم وخصوصاً الدنيا برد اليومين دول .. طيب قبل ما أروح أكمل نوم عايز أقول حاجتين ... الأولى إن إللى يقدر يوصل لحازم صلاح أبو إسماعيل يبلغه إنه بيتم إعداده ليكون كبش فداء فى الأحداث وسيتم تصديره فى المشهد من قبل الليبراليين إللى كارهينه سم لكنهم رافعين صوره تمهيداً لاستنزافه وتلويث سمعته وقتله سياساً لأنه بات المرشح الأكثر ثقة بين جموع الشعب المصرى لذا أبلغوه بأن يرحل من الميدان...
أما الأخرى وأختم بها .. يا كل أعداء مصر .. يد الله تعمل فى الخفاء وستفضحكم جميعاً
