اتصل بى المهندس ابراهيم محلب وزير الاسكان بعد ان كشفت فى تحقيق صحفى نشر بصوت الامه ان كبار المسئولين بوزاره الاسكان يتقاضون مبالغ ماليه تصل الى 200 الف جنيه فى الشهر وعلى راس هولاء راندا الجرف مديره مكتبه ودار هذا الحوار
محلب : الو الاستاذ احمد ابو الخير ..انا ابراهيم محلب
انا : اهلا معالى الوزير
محلب : حضرتك ناشر رواتب مديره مكتبى وعدد من المسئولين بالوزاره الارقام دى صحيحه
انا : ايوة يا فندم وانا ناشر ايصالات الصرف نظير عضويتهم بلجان تصل الى 60 لجنه وبدل الجلسه الواحده الفان جنيه وبتنعقد اللجنه الواحده خمس مرات فى الشهر ع الاقل وان مديره مكتب حضرتك تحديدا مححاضره ست للجان فى وقت واحد انعقدت فى مقر هيئه المجتمعات العمرانيه باكتوبر وفى مقر وزاره الاسكان ... يعنى الحضور وهمى للحصول على بدل الحضور ... واجمالى هذه الاموال تصل الى 200 الف جنيه فى الشهر غير الرواتب وعضويتهم فى مجالس ادارات الشركات والبنوك
محلب : يا خبر اسود دانا مبحصلش ربع الفوس دى ... يا ابنى عايز اقولك انى طلبت ملف ومكافأت اللجان دى ومحدش ادهانى وتوهونى ...ممكن تبعتلى نسخه من قائمه المستندات واجمالى اللجان اللى معاك
انا : اوى اوى يا فندم .. بس عايز اقولك انه عيب بعد الثوره يكون محمد ابراهيم سليمان يكون مطلع قرار ان تقاضى مكافات اللجان يكون من خمس لجان فقط من الشهر وما زاد يكون تبرعا ... وبعدين فين الحد الاقصى للاجور
محلب : هاتلى الورق بس وربنا يسهل انا بجهز للقرار ده ....
انا : حاضر .. امتى يا فندم
محلب : يوم الاحد ابعتلى رساله الصبح وهقولك مواعيدى
انا : حاضر
محلب : اشكرك يا استاذ احمد
وبالفعل ارسلت له رساله يوم الاحد وانتظرت ان يحدد موعد اللقاء ولم يوفى بوعده ... ليستمر حيتان وزاره الاسكان فى تقاضى رواتب من اللجان برواتب تصل الى 300 الف جنيه شهريا الى الان
وزير اعترف لى ان مساعديه تلاعبو به وتوهوه واخفو عنه تقارير طلبها منهم ...... كيف سيدير مصر