الطفلة إسراء حسن .. ضحية جديدة للإنقلاب العسكرى

دي صورة الطفلة ‫‏إسراء حسن‬ اللي اتحكم عليها بسنتين سجن مع الشغل والنفاذ إمبارح .. الصورة دي يوم القبض عليها هيا وعمتها عزيزة السيد أحمد وسهام عبد الهادي..

الحكاية باختصار إن بنت رايحة مع عمتها لطبيب الأسنان .. ومعاهم روشتات العلاج وورقة بميعاد الكشف كمان .. كل جريمتهم الحقيقية إنهم لابسين نقاب!
وبمجرد مرورهم من جنب جامعة الإسماعيلية يوم 5 يناير .. كانت أوامر جاية للبشوات إنهم ينقوا خمس ست طالبات كده علي مزاجهم عشان يودوهم قسم تاني أحسن حجز البنات فاضي والباشا المأمور مضايق..
ظابط راح موقفهم .. وطلعوا بيهم علي القسم .. إيه التهمة!؟ .. امشي وخلاص .. أيوة يعني إحنا عملنا إيه؟ .. اتكتمي وهتعرفي هناك يا بنت الـ …
وهكذا .. تحولت الطفلة إسراء بقدرة قادر من واحدة رايحة مع عمتها لدكتور الأسنان .. إلي متهمة بالمشاركة فى مظاهرة الجامعة (هيا مش في الجامعة أصلا) .. تكدير الامن العام (عشان راحت لدكتور أسنان)، مخالفة قانون التظاهر (عشان ماشيين 3 مع بعض)، تعطيل الدستور (عشان لابسين نقاب)، وغيرها من الاتهامات الواضحة والحقيقية!
إسراء اتحكم عليها مع 17 طفل تانيين إمبارح بالحبس عامين مع الشغل والنفاذ!!
أما عماتها سهام وعزيزة .. فمحبوسين من يوميها في نفس القسم (قسم تالت الإسماعيلية) بنفس التهم برضه.. ومستنيين جلسة نطق حكم كمان كام يوم هما كمان!
ملحوظة أخيرة: فيه في الإسماعيلية 13 بنت معتقلة غير إسراء في قسم تاني وتالت كلهم منتقبات .. ودا أكبر من عدد البنات المعتقلات في القاهرة نفسها .. وأكبر عدد في محافظة واحدة علي مستوي الجمهورية لحد دلوقتي..
المشكلة إن الأمر دلوقتي تحول من مجرد احتجاز عشان يأمنوا القسم بالبنات (حسب كلام المأمور اللي وعد الأهالي إنهم مش هيتحولوا محكمة ولا هيتعمل لهم قضية) .. لمحاكم وأحكام وسجون..
عمار مطاوع